家中試玩純兩聲道 Soul Note SA730合併擴音機 + 同門 SC300 CD/CAS Player
2017-07-05
小瑟玩同睇 AV 都好多年了, 一直都係用返部AV AMP聽下歌都已經好開心, 上年12月同 Soul Note 攪左場活動『Soul Note 悠閑享樂一刻鐘兩聲道體驗會』之後, 係靚仔ShowRoom聽過入門價的兩聲道器材原來都可以有幾入得耳的表現, 但究竟返到屋企又係唔係果回事呢??? 今次小瑟就借返上次活動的一套合併式擴音機 SA730 及 CD/CAS 播放機 SC300回家實試一下呢.^^"
只在貴價機先會出現的「無負回輸技術」設計
同大家介紹下呢二部機先, 因為尺寸的關係, SC300 CD盤的機身竟然比 SA730 的為深, 所以小瑟就先以呢個方式影相比大家睇, 上面的就是 Soul Note 的入門級合併式擴音機 SA730, 而下面的就係 CD/CAS 的 SC300, 上次活動都有提過, 呢二部最巴閉唔係價錢, 而係佢二個都用上貴價機先有的「無負回輸技術」(Non-Negative Feedback) 設計, 因為佢線路的優勢, 所以一直以來好多朋友玩過 Soul Note 都會對其透澈度、動態瞬變的駕馭力有非常不錯的評價呢.
SA730 寫真照
Soul Note SA730 定價 HKD$17980, 走中階路線, 但用料和規格都十分講究, 原因係 Soul Note 的研發團隊其實就係 Marantz 及 Philips 的前資深技師, 佢地一直都致力在數碼音響上有極豐富的經驗, 所以在設計 Soul Note的產品上都盡得精髓. 而 SA730 的電路佈局及走線, 電容分區和線材都採用了對稱式理念, 咁樣設計可以令箱內部件的互相干擾減到最少.
∇ 六組輸入位置, 二組屬於全平衡設計, 四組為 RCA輸入, 絕對夠用.
∇ 機內設計為對稱式理念, 有效減低了原件間的互圍干擾!!(網上圖片)
SC300 CD機寫真照
入門玩家都希望可以入手一部純播唱片的CD盤, 所以今次小瑟試的都只是 HKD $6,980 的 Soul Note SC300 CD/CAS 播放機, 除左可以播CD之外, 佢仲有一個 USB Type B輸入在背後（可解讀16bit/24bit和44.1kHz/48kHz/96kHz的音樂檔案）, 明顯係迎接 CAS 來的世代, 大家都可以會用上電腦作為訊源吧, 咁都好, 始終10年後都應該唔會再有唱片呢回事了…大家都一係就聽串流, 一係就買檔案聽歌吧. 另外值得一提的是 SC300的重要元件均是來自日本, 而解碼就用上 Burr Brown PCM 1796, 明顯地 SC300 的目標就是做好 PCM 的轉換工作, 讓 PCM 的訊源可有更高的還原度.
∇ SC300 設有兩個同軸輸出, 一個是正常的同軸輸出, 輸出數碼訊號. 而令一個同軸輸出是 Transport 模式, 小瑟所知, 好多朋友都搵緊淨 Transport 轉盤, 所以 SC300 應該都有一定的優勢呢.
分享一快一慢的聽感分享
首先一定要做的就係拆左套AV前置喇叭線, 事關影音分家係必須的, 小瑟獨立地將整套系統接駁到呢套 SoulNote 西裝上, 再將對喇叭拉出來盡量做到離牆最小都有一尺的空間, 咁先似玩兩聲道架麻XDDDD, 小瑟先以《Haydn String Quartet in D, Op. 76, No. 5 – Finale – Presto》24bit/96kHz版本, 雖然小瑟只用上KEF XQ10 書架喇叭, 但對於一直未試過在家中專心聽兩聲道系統的小瑟來說, 最大感覺絕對係音樂背景中的寧靜度比AV AMP非常非常大的分別, 音樂中小提琴的拉弦感同空氣感都非常細緻, 幼滑, 而呢首音樂中有好多音背景空氣聲, 都可以係唔需要用好大音壓上就已經聽得好清楚, 正呀!!! 再來就係聽下小瑟最愛的頭版《Beyond – 海闊天空》16bit/44.1kHz版本, 一來鋼琴聲, 已經好唔同, 果份音樂感係平時係人地 Shhowroom 先有機會感受到的, 當然小瑟屋企比起佢地D Showroom一定係仲有排追果隻啦, 但估唔到一套咁平的HiFi組合都可以出到一份咁強的音樂感, 而且係厚得來唔肥, 爆棚位可以出到從容不迫, 而且小瑟都唔洗開到好大聲應該有比音樂包圍住的感覺, 死火……….有一點回不了頭的感覺呢!!!!@@"
Conclusion : 「正想入門兩聲道的你值得去試聽一下!!」
呢個試玩組合只係小瑟屋企玩左一個下午, 因為家中仲有其他成員需要睇電視, 睇佢地的卡通片, 所以可以試的就只有數隻唱片的時間, 但就在呢短短的數小時中, 小瑟已經非常滿足地知道如果要聽到美妙的音樂, 是一定要付出的, 而呢個付出唔只係金錢, 仲要有心機, 因為依家小瑟屋企的狀態, 要考慮整多套兩聲道影音分家真係談何容易呢???? 但呢份令人放鬆心情去投入享受音樂的那份感覺, 又唔係AV比到我的………..呢刻, 我真係要爆了……….個頭…….@@" 講返套 Soul Note 先, 依家計埋我對 XQ10 喇叭成套系統都不過三萬, 已經比到一個似似地樣的立體感及高雅的音樂感我, 而且最難得係 Soul Note 在處理大場面時, 都唔會話一下子有控制不了的感覺, 呢點係小瑟幾深刻的呢, 如果大家都希望可以平平地開始進入 Hi-Fi 世界 , 享受下聽歌仔的樂趣, Soul Note 呢個牌子, 呢對 Soul Note SA730合併擴音機 + Soul Note SC300 CD/CAS Player 組合的確係一個幾值得去試聽一下的選擇!!!
Soul Note SA730
Soul Note SC300
查詢：雅詠音響(2324 9968)
