【港創．意】送出人情細味　DIY精美小品！

送份人哋鍾意嘅禮物，都唔係單純金錢可以解決嘅問題，有時諗到頭都大埋！反而自己多手handmade一件，會唔會仲易得到歡心呢？其實自己造一份禮物，可以好實用之餘又會過足手癮，可能仲抵玩！

 

如果你都有興趣handmade一份禮物，但又對自己嘅手藝冇乜信心嘅話，Make Centre會好樂意指點吓你嘅！Make Centre係一個手工藝品workshop，裡面其實由好幾個年輕嘅藝術工作者打理，以及教授唔同嘅手工藝課程，就好似有木製音樂盒、時鐘、字母燈箱、皮具等等，林林總總，聽講佢哋仲陸續諗緊有咩作搞作！

 

Make Centre導師 ︳Kady Fung

 

Kady係Make Centre嘅導師，但另一方面，佢亦都係Make Centre創辦人。Kady：「我開咗Make Centre總共都有5年，起初就係喺觀塘嗰邊，地方大概只有三百呎左右，唔係好大，所以有啲手作唔可以喺嗰邊做，咁漸漸教班多咗收入都穩定咗，就喺上年搬咗過嚟新蒲崗新址。地方大咗，機械都多咗，所以我哋開多咗好多唔同嘅班。」

 

 

Workshop嘅課程當然唔少，不過唔想一開始就太複雜嘅話，就可以從DIY音樂盒、小燈箱開始，一個小小嘅手作，都已經包含咗木工、電子、機械，仲有藝術，好幾種元素喺入面，唔留心上堂都有機會失敗o架！Kady話，每逢大時大節如聖誕、情人節前夕，嚟報名「趕工」嘅人一啲都唔少，尤其係近排好紅嘅「小王子」燈咁，用嚟送禮、自用都一樣咁開心，加上製作唔算得複雜，造好之後仲可以自己上色，聽落都幾唔錯吖！好，等小編等吓小王子燈難唔難整先！

原來導師會預先將小王子燈需要嘅木材預先切割好，唔切自己「操刀」安全得嚟，仲大大提升作品質素！而學員接過板材之後，只係需要些少打磨，基本上就可以用萬能膠、剪刀，同一啲好簡單嘅工具就可以「開工」！

經過電腦畫圖，就可以輸入鐳射切割機替木材塑形。

簡單修口，就可以交由學員使用。

除了木材，學員仲需要連接燈泡。

最後，經過上色就完成好「小王子」燈。

通電後嘅「小王子」似乎仲精靈喎！

 

有好多人都會問，究竟手作禮物耐唔耐用，會唔會造咗出嚟唔夠靚？呢層小編可以話你知，其實好嘅手工精品一啲都唔小學雞，喺創作過程一樣搞盡腦汁、花盡心機，你想你嘅製成品美觀、耐用，就要從製作中嘅每一個細節著手，造好之後，成功感比起買一份禮物就大得多！

 

查詢：Make Centre ( 2345 9282 )

 

－－－－－
注意！Price 限時購出沒！精選貨品，日日更新，立即搶購！