【遊戲介紹】濃厚港式功夫片味 《師父》會不停變老的功夫體驗遊戲

在早前播放嘅 PlayStation 直播節目「State of Play」入面，有一款令人大感興趣嘅遊戲《師父》（Sifu），遊戲充滿住濃厚港式功夫片味道，加上主角會不停變老嘅設定，令人非常期待。

《師父》係由法國遊戲團隊 Sloclap 製作（曾製作推出《Absolver》），係一款武術動作遊戲，採用第三身視點。遊戲講述主角一家慘被神秘刺客滅門，為咗復仇主角用咗八年時間準備。八年後主角搵返當年嘅兇手，以一身好功夫以及一個有起死回生功效嘅神奇吊墜上路尋仇，但係呢個魔法有其代價，每次復活都會老化。

玩家要走遍城市各個隱藏角落追捕刺客，由幫派橫行嘅郊區到企業大樓嘅冰冷走廊，另外玩家亦要巧妙利用環境為自己取得優勢，例如投擲物件、除手執野當武器用、窗戶及突出外牆等等。另外喺宣傳影片中見到遊戲有大量港式功夫電影味道，例如運鏡、招式、場景等極有《葉問》、《古惑仔》嘅影子。另外根據官方介紹，隨遊戲推進會解鎖技能，似乎會有育成要素。

《師父》（Sifu）預計於 2021 年推出，對應平台為 PS5、PS4 及 PC 。