歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】用各種熟悉面孔冒險 《迷托邦》輕鬆搞笑角色扮演遊戲今月推出

2021-05-08

任天堂喺今個月會推出一隻非常得意嘅遊戲《迷托邦》(Miitopia),遊戲中使用嘅角色同埋敵人係大家用「Mii」所製作嘅公仔,亦即係話用大家熟悉嘅面孔冒險,加上各種有趣搞笑嘅設定,係今個月非常值得入手嘅遊戲。

迷托邦

《迷托邦》之前曾經出過 3DS 版本,今次係經過強化嘅移植版,係一款回合制角色扮演遊戲。遊戲舞台係一個由劍與魔法交織而成嘅幻想世界,然而喺呢個世界登場嘅人物全部都由玩家決定,主角係自己個樣、魔王係媽媽個樣、同伴係自己嘅朋友,基本上整個世界都係由自己設定。要達成個目的,自然要配合強大嘅「Mii」製作器以及《迷托邦》入面專屬嘅「化妝」及「假髮」功能,外國就有大量玩家製作「城之內」、「炭治郎」、「Harley Quinn」等角色,最正嘅係整完隻人會有角色代碼,可以分享比其他網友使用!

整個人物就可以開始旅程,戰鬥基本上係採用傳統角色扮演遊戲回合制,都係升LV 學技咁,職業有戰士、魔法師、僧侶、盜賊、偶像、廚師六種,各有所長。最有趣嘅係所有角色都會追加「性格」,唔同嘅性格會有唔同嘅行動,例如「溫柔」會有機會幫隊友抵擋攻擊,但亦會因為不忍而導致攻擊失敗;「頑固」會因為對自己攻擊效果唔滿意而再次發動攻擊,但亦會覺得情況未夠危急而阻止隊友回復,非常得意!

迷托邦

另外人物與人物之間有好感值存在,數值高的話戰鬥中會得到幫助,或者得到援助物品等等,但係亦會因為旅程疲累而產生磨擦,好似妒忌對方出風頭,然後自己心有不甘,喺戰鬥時互相阻礙,要和好先會解除呢個狀態。遊戲中存在各種活動增加好感度,好似係唱 K、睇戲、釣魚等等,同「劍與魔法世界」反差極大,玩落非常歡樂。

迷托邦

《迷托邦》預定於 5 月 21 日推出,對應平台為 Nintendo Switch,支援繁體中文,另外現時任天堂 eShop 有體驗版下載,資料可嘅繼承至正式版。

-----

此文章由VJGamer 遊戲殿提供

想早一步接收最新電玩資訊,請click VJGamer 遊戲殿 Facebook 專頁