【遊戲介紹】平面可愛版 Outlast 《Last Light》試膽大會中一去無回頭

睇日本動漫好多時都會有「試膽大會」情節，即係一至二人喺夜晚前往令人有恐懼感嘅地點（例如夜晚的森林），然後行一圈又或者拎特定物品返去指定地點，主要係用黎驗證勇氣。今次介紹嘅遊戲《Last Light》就係發生喺「試膽大會」進行中途，突然發生靈異事件，但係以可愛畫風表達，即使怕玩恐怖遊戲嘅朋友都可以一試。

《Last Light》由 Team Corn Field 製作，係一款動作冒險恐怖遊戲。故事發生喺前往試膽大會途中，主角冬花行行下發現身邊嘅朋友消失晒，呢個時侯一棟廢棄醫院映入冬花眼簾，無選擇下冬花唯有拎住僅有線索學生證，探索呢間廢棄醫院，而喺呢度只有「逃跑」一個選項。

玩家整個探索過程中只有一支電筒同埋微弱火光嘅蠟燭，並無任何攻擊手段，而喺醫院入面會有一班「鬼」會襲擊冬花，所以見到鬼只可以逃走，亦可以利用醫院地形、儲物櫃等躲藏，有時仲會執到可以短暫妨礙鬼嘅道具，必要時可救自己一命（基本上同《Outlast》差唔多）。至於鬼亦有種類之分，例如無光就見唔到佢真身嘅「潛影黑闇之鬼」、可聽見任何細微聲音嘅「隱密氣息之鬼」等等。

探索醫院時會得到一份零碎嘅繪圖日記，每份日記都係記載住有關醫院血腥過去嘅唯一線索來源，透過收集日記碎片將會逐漸解鎖劇情真相。另外隨遊戲每一輪難度提升，將會解鎖更多嘅劇情以及加深玩家對劇情嘅期待，似乎要多周目先會知道劇情全貌。

《Last Light》預計於 8 月 26 日率先於 PC Steam 發售，Nintendo Switch 則於稍後公開發售日期。