歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】漏電機械人逃亡記 《ElecHead》極度好評益智解謎動作遊戲

2021-10-21

今次為大家介紹嘅遊戲《ElecHead》畫面用色簡單,主色只有黃藍兩種顏色,加上使用 4:3 畫面比例,感覺好有 Game Boy Color feel。雖然望落去有啲單調,但勝在創意遊玩性搭救,喺短短幾日已經得到「極度好評」評價,而且仲得到一大班知名遊戲製作人嘅讚賞,絕對係一款內涵滿分作品。

《ElecHead》由獨立製作人 NamaTakahashi 開發,係一款平面益智解謎動作遊戲。故事舞台位於一個已經失去電力嘅黑暗世界,玩家將扮演一部漏電機械人「Elec」,喺廢棄工廠中尋找出路並肩負令世界重獲光明嘅重任。

遊戲有趣嘅地方在於玩家係一部漏電機械人,所以同佢接觸嘅物件都會導電,同時啟動螢幕等設備,而且仲順便開埋周圍啲機關同陷阱。由於身處嘅地方有大量電動設備,玩家就要利用漏電嘅特性去開啟同關閉各種設施前進,例如通過與地面或牆壁接觸令到運輸帶或升降機運作。隨遊戲推進,玩家會獲得投擲頭部能力,可達成先投擲頭部去發電位,利用頭部發電特性,再以身體移動去開啟遠處機關等操作,但頭部如果離開身體太耐的話會爆炸,所以要小心拿捏頭身分離時間。

遊戲中嘅謎題難度等級分得唔錯,有簡單有高難度的,亦無特定解決方法,玩家可以實現各種想法去嘗試解謎。另外遊戲中移動、落地、電流聲同埋背景音樂等音效頗為悅耳,負製製作佢哋嘅獨立遊戲作曲家 Tsuyomi 應記一功。

作品出色,自然會有人賞識。《ElecHead》得到多位知名遊戲人高度評價,當中包括《Spelunky》系列嘅 Derek Yu、《Celeste》嘅 Maddy Thorson、《Downwell》嘅 Moppin,就連 SIE 嘅吉田修平亦都話呢款遊戲係今年最好嘅遊戲之一,高度推薦鍾意玩動作拼圖類遊戲嘅朋友。

《ElecHead》已於 10 月 14 日推出,對應平台為 PC Steam 及 itch.io,製作人亦希望將本作移植至 Nintendo Switch 並開發續集。

-----

此文章由VJGamer 遊戲殿提供

想早一步接收最新電玩資訊,請click VJGamer 遊戲殿 Facebook 專頁