【遊戲介紹】誓要成為千王之王 《Card Shark》靠千術縱橫法國的賭博遊戲

睇戲睇漫畫成日都有以賭為題材嘅作品，鬥智鬥心理之外不乏「出千」元素。雖然打機好多遊戲都有賭博成份，不過內含大量出千手法嘅嘅遊戲並唔多。今次介紹嘅作品《Card Shark》就係以出千為主嘅賭博遊戲，做賭神定做化骨龍全無難度！

《Card Shark》由 Nerial 開發，係一款角色扮演卡牌遊戲。舞台設定於十八世紀法國，透過一手高超嘅牌技及千術，以邁向國王牌桌、登上社交圈最高峰為目標。根據遊戲介紹，玩家喺遊戲中會學識諸如標記紙牌、假洗牌、暗中換牌、假發牌等出千手段，一步步賺取金錢，最後買通門路邁向國王嘅賭枱。

出千唔比人發現自然無問題，但萬一比人發現就會引起衝突。呢部份官方雖然未有相關資訊，不過就有一段格劍片段，而且喺分類一欄上有填上「動作冒險」，估計遊戲中會出現少量動作戰鬥系統，或者係比錢求饒之類玩法。

《Card Shark》預計於 2022 年正式推出，對應平台為 Nintendo Switch 及 PC Steam，支援繁體中文。