歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】睇就容易玩落勁難 《Heavenly Bodies》無重力狀態下與好友於太空作業

2021-12-10

唔知大家有無印象之前有隻號稱史上最難嘅遊戲《QWOP》(因為只係用鍵盤上面呢四個制),內容極簡單,就係控制一名運動員跑完一百米就得,但因為要由玩家操作左右腳肌肉以及重心控制,基本上行到一步已經係大師級。今次介紹嘅遊戲《Heavenly Bodies》同前者有啲類似,玩法好簡單,但係玩家要分別操作太空人嘅左右手臂、左右手指、左右腳,即使係好簡單嘅動作都唔會輕易做到,加上喺太空無重力狀態下就更難搞,好有挑戰性!

Heavenly Bodies

《Heavenly Bodies》由獨立團隊 2pt Interactive 開發,係一款物理模擬解謎遊戲,支援單機雙人合作。玩家扮演一位太空人,去到宇宙組裝最尖端嘅太空站並令系統投入運作,整個過程只有身處地球嘅指揮部無線電通訊協助,其他野必需靠你自己完成,當中包括組裝太空望遠鏡、維護精巧太陽能電池板、研究宇宙植物學、採集隕石樣本等等。不過要注意所有野都係處於太空無重力狀態下,亦即係話任何工作都變得更困難更難掌握。

Heavenly Bodies

上面有講過,喺呢隻遊戲入面嘅操作極為獨特,唔係傳統左菇行右菇轉視點咁玩。官方強烈建議本作要用返有雙冬菇嘅手制玩,左右冬菇分別係控制左右手臂、L2R2(LTRT)就係操作手腕到手指嘅動作、L1R1(LBRB)就係操作左右腳,由於要分開操作四肢,就算係調教發射器角度咁簡單嘅動作都好難搞,如果兩位玩家合作遊玩的話難度就更高。雖然本作操作需要具備一定技巧,但係製作團隊都唔想大家玩都無癮,所以有得自訂控制模式難度以及重新綁定控制按鍵。

Heavenly Bodies

《Heavenly Bodies》已於 12 月 7 日推出,對應平台為 PS5、PS4 及 PC Steam,支援繁體中文。