歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲新聞】多人模式開發中 《薩爾達傳說:曠野之息》玩家自製最多支援四人同遊

2022-01-14

《薩爾達傳說:曠野之息》係近年最出色最具代表性嘅遊戲應該無人有異議,佢有幾完美應該唔需要多講,但係唔少人心目中都係欠缺一樣野,就係「多人遊玩模式」。於是舊年十一月就有位 YouTuber PointCrow 出資,希望有人能夠製作多人連線模式,最正嘅係真係有人做緊出黎,仲有初期開發影片睇,好似樣!

薩爾達多人模式

YouTuber PointCrow 喺舊年十一月果陣出咗一條 Twitter,內容係只要任何人製作《薩爾達傳說:曠野之息》多人模式 Mod,就可以得到 10,000 美元,但前提係呢個 Mod 最少可支援兩位玩家遊玩,必需完全免費,並且需於《薩爾達傳說:曠野之息》續集推出前兩個月搞掂。賞金雖然並唔係話好多,但熱愛呢款遊戲嘅玩家群非常龐大,多人模式又可以話係共同願望,有賞金鼓勵自然強化大家製作 Mod 嘅動力。

薩爾達多人模式

為咗完成呢個 Mod,模組製作者 Alex Mangue 聯同 Sweet、Ethi 攜手開發多人模式,並且不時更新開發狀況,最近更上載展示影片。現階段見到其他角色同樣可以跑跳爬牆打怪,不過就估計會有限制連線範圍,因為有唔少遊戲喺連線模式下,超出一定範圍會自動傳送返主機附近,以此控制運算資源(例如《Anthem》、《Outrider》)。另外,雖然畫面表示其他玩家使用不同角色,但實際都係用緊自己隻林克,只係用咗外觀模組。

薩爾達多人模式

現時呢個多人模式 Mod 仲係處於早期開發階段,仲有大量問題需要解決,例如角色動作同步、怪物血量同步等等,需要時間慢慢解決。不過開發多人 Mod 要面臨嘅問題都係強大嘅任天堂法務部,開發團隊成員就話 Mod 係完全免費唔打算賺錢,加上係 Fans 製作並無任何版權,相信任天堂唔會對佢地採取行動,作為玩家當然亦都希望任記隻眼開隻眼閉。

薩爾達多人模式

《薩爾達傳說:曠野之息》嘅多人模式 Mod 未有實際推出時間,有興趣嘅朋友可以 Follow 返製作團隊 Twitter。