【遊戲介紹】四人合作太空打寶 《Space Punks》俯視角射擊挑戰外星異型

好似《Diablo》咁，同幾個朋友一齊打寶刷裝，果份歡樂的確係正，奈何最近都無乜差唔多嘅遊戲。喺上年進行搶先體驗，黎緊即將推出正式版以及家用機版本嘅《Space Punks》，不但可以同朋友連線打寶，仲係以類似《Alienation》、《Shock Troopers》咁玩，真係新舊玩家都啱。

《Space Punks》由 Flying Wild Hog 開發，係一款動作角色扮演射擊遊戲，採用俯視角度，最大支援四人連線遊玩。玩家將扮演主角 Duke 與佢嘅伙伴（可選擇扮演任何一角），喺各大星球中冒險，擊殺異型與海盜奪取寶物。基本上就類似《Diablo》嘅機制，主要都係刷裝刷道具，但係就變成射擊版，而美術部份就有濃濃嘅《Borderland》味道。

作為一款打寶遊戲，自然有大量武器供選擇，由近戰嘅刀劍、遠距離槍械、火焰噴射器、各式手榴彈等一應俱全，玩家可自由配搭。透過完成任務、推進劇情、殺敵等方式，將會解鎖更多戰利品同技能樹。另外根據官方資訊，之後會持續增加更多星球及活動，會以長期營運作為方針。

《Space Punks》喺舊年 7 月已經喺 Epic 做緊搶先體驗，但係去到 4 月 20 日就會完結，之後遊戲會變成免費遊玩，更會於今年內推出 Xbox Series X|S 及 PS5 版本，有興趣嘅朋友留意啦。