歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】開放世界生存動作 《V Rising》多人連線與好友重建吸血鬼王國

2022-05-27

「我不做人啦!JoJo!」呢句名台詞令人類開始嚮往做吸血鬼,早排進行搶先體驗嘅新作《V Rising》就係要玩家扮演吸血鬼,與好友共同喺開放世界中生存、戰鬥、建設,逐步去建立自己嘅吸血鬼王國,聽落都覺得吸引。

V Rising

《V Rising》由獨立遊戲工作室 Stunlock Studios 開發,係一款生存動作冒險遊戲,採用開放世界,支援多人連線遊玩。故事講述喺沉睡幾個世紀後,吸血鬼再次醒來,但係瞓咗咁耐身體已經變得非常虛弱。因此必需尋找血液補充體力,同時重建城堡躲避致命嘅烈日,將人類變成你忠實嘅僕人,抵抗專門獵殺吸血鬼嘅聖騎士以及其他虎視眈眈嘅吸血鬼,建立自己嘅吸血鬼王國。

V Rising

遊戲基本玩法同其他開放世界生存遊戲類似,都係要探索森林、洞穴、村落等地方尋找資源維持生命以、興建各種建築物、製作裝備。由於你所扮演嘅係吸血鬼,所以你同你嘅伙伴喺日間要喺陰影下行動,否則你會變成灰,夜晚則可自由行動,掠奪村莊放題、擊殺頭目等等,因此要計劃定日頭同夜晚嘅前進路線。

V Rising

透過收集資源,你將可解鎖古老技術獲得黑暗力量,解鎖更多建築物以及知識建造城堡,喺城堡可儲存戰利品並可研發科技,並培育軍隊。作為吸血鬼,戰鬥時自然可施展各種技能、劍技及法術,頭目戰則有《Diablo 2》嘅味道,但係速度感更為優勝,連技亦非常爽快。當然,擊敗敵人後有機會獲得新嘅法術,慢慢就可以整一套啱自己嘅技能組使用。

V Rising

《V Rising》已於 Steam 進行搶先體驗並獲得「極度好評」評價,正式版預計於 2023 年夏季推出。