歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】極度好評工業模擬 《Captain of Industry》硬核內容開採建造研究貿易一腳踢

2022-06-24

建設模擬類遊戲做得好嘅往往都變成「精神時光屋」,今次介紹嘅《Captain of Industry》不但屬於呢類,更因為內容夠 Hardcore,由摸索去到識玩呢個階段已經極之令人沉迷,喺 Steam 上亦得到「極度好評」評價,肯花時間研究的話絕對值得一玩。

Captain of Industry

《Captain of Industry》由 MaFi Games 開發,係一款工業模擬建設遊戲,採用開放世界設計。玩法基本上就係要你帶領一班難民,喺一座荒島上建造殖民地同工業,目標最終可自給自足。由於本作係偏向 Hardcore 玩法,所以並唔會好似其他模擬建設遊戲咁,一步步教你點玩。相反,佢只有極少量嘅教學提示,絕大部份時間都要靠玩家自行摸索研究,加上本作有好大嘅科技樹,啱晒想挑戰高難度玩家。

Captain of Industry

遊戲初期都係要先搞掂生存要素,即係開採原料、種植,之後就要建造工廠製作產品、車輛等,同時要研究新技術,仲要考慮抽地下水幫補水源、填海等等,同現實非常相似。由於所有元素都息息相關,所以好講求早期規劃。例如本作基礎係以泥頭車作為建設、資源運輸核心,所有物資係要靠佢地運輸,所以喺開採挖洞時要注意斜度,如果唔係車輛無法駛入,咁就無得載走挖出黎嘅資源、泥、垃圾;而洞挖得太深會冧,要一邊做擋土牆固定先可以 Keep 住挖。另外,挖出黎嘅資源有唔同用法,例如泥土可用於平坦區域種田;岩石可打碎成沙;廢礦、沙可用黎做水泥等等。

Captain of Industry

當技術展到咁上下就可以接駁運輸帶,但因為要留位比泥頭車行,所以管道走線,或者升高做架空運輸都要一早規劃,玩得叻嘅玩甚至可以將管道排成直線,後期變成車用橋樑。玩家除咗要發展自己土地,亦要建立船隻探索世界,尋找盟友進行貿易,有時更會搵到難民帶佢地返黎增加人口。不過,海上兇險,有海盜對你虎視耽耽,所以要建造戰艦進行海戰。(後面仲有得發射火箭探索宇宙)

Captain of Industry

《Captain of Industry》已經推出,對應平台為 PC Steam,暫時只有簡中。