【遊戲介紹】偽可愛風格恐怖冒險 《Before The Night》人類被當成牲畜飼養的世界

動物好可愛，有養小動物嘅應該都會同意。但如果掉返轉，世界由動物主宰，人類只係被當成寵物、牲畜般飼養又會係點？新作《Before The Night》就係講述一個咁嘅世界，仲要係一隻恐怖遊戲，諗起都正！

《Before The Night》由韓國獨立遊戲工作室 Uneducated Game Studio 開發，係一款恐怖冒險遊戲。喺呢個世界入面，動物們係具有智慧嘅一方，人類則係智力低下被馴化、被飼養一方，絕大部份嘅人類都無法以雙腿行走。主角「麗莎」同樣係被飼養嘅寵物人類，但係主人動物愛麗絲死後，麗莎不但受到其他動物嘅欺淩，更因為對主人深厚嘅愛，對佢依依不捨。傳說中「生命之花」可以令死者起死回生，於是麗莎決定奪取生命之花並對其他動物復仇。

遊戲玩法主要係操作麗莎於地圖上行動，收集由兔仔用鎖或陷阱保護嘅生命之花，玩家要針對唔同情況使用不同工具。例如可用兔仔最愛嘅紅蘿蔔去交換鑰匙或者武器，亦可以趁佢哋唔為意喺背後用錘仔偷襲。但以上所講嘅只限日間，因為夜幕降臨後，所有睇落可愛嘅動物居民都會狂暴化變成可怕嘅怪物，會不停追殺玩家。你可以做嘅只有躲進草叢或向佢地投擲武器拖延時間，直到早上來臨。

《Before The Night》預計於 7 月 14 日推出，暫時只有 PC Steam 及 itch.io 平台，有簡中，現時 Steam 有提供免費體驗版。