【遊戲介紹】手繪風格地城冒險 《Litha and the Sunhouse》節奏快速 Roguelite 動作角色扮演

唔知大家有無玩過隻叫《Nobody Save the World》嘅遊戲，俯視視角加節奏快速嘅戰鬥，極引人入勝。黎緊有款新作《Litha and the Sunhouse》，戰鬥部份同前者都係差唔多咁形式，但加入 Rougelite 及採用手繪風格，日前就正式公開首部預告片，下年有得玩。

《Litha and the Sunhouse》由獨立團隊 Team Overbloom 開發，係一款 Roguelite 地下城冒險動作角色扮演遊戲，採用俯視視角。遊戲主打節奏快速加 Roguelite 要素，喺隨機生成嘅地下城中冒險，以各種武器及技能打怪尋寶，當中會收集到神器及遇到新嘅同伴加入，不停強化自己團隊去挑戰最終大魔王。

玩家可透過「卷軸」學習古代魔法及未來技術去擊敗敵人，收集返黎嘅「神器」就可以強化角色或解鎖新同伴。另外，只要完成各種任務就可以升級據點，將會提升各種獎勵及增加唔同嘅挑戰項目，成功的話會有更好嘅報酬。

《Litha and the Sunhouse》預計於 2023 年推出，對應平台為 PC Steam。