歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】紙造世界恐怖冒險 《Paper Cut Mansion》於隨機古老大宅與敵鬥智鬥力

2022-10-23

用「紙」做主題嘅遊戲唔少,但同時玩埋恐怖元素嘅又真係唔太多。新作《Paper Cut Mansion》係一款喺紙造世界中冒險嘅恐怖遊戲,奇特嘅美術加上燈光運用,立即賦予遊戲一種獨特嘅味道,撞正檔期推出,夠晒應節!

Paper Cut Mansion

《Paper Cut Mansion》由 Space Lizard Studio 開發,係一款 Roguelite 恐怖動作冒險遊戲。玩家將扮演紙造世界(所有角色、道具、場景都係由紙造的)入面一位刑警「Toby」,奉命進入一座充滿謎團嘅古老大宅進行探索及搜集證據,解開埋藏於此不為人知嘅祕密。

Paper Cut Mansion

喺古老大宅中有大量隨機生成房間存在,並會分成不同次元,有機會係解謎鬥智空間,有機會係敵人等待你嘅戰鬥空間,亦有機會係於寒冷環境下尋找熱源求生空間,隨配置不同會改變美學及玩法,每次遊玩都充滿驚喜及樂趣。

Paper Cut Mansion

戰鬥部份,玩家可自訂啱自己嘅風格,可以 Set 做近戰又或者做遠攻射擊,亦可以設置戰鬥無人機或工程機去起陷阱同砲塔,玩法極自由。隨遊戲推進會解鎖新能力及新裝備,令你可組合嘅玩法更多。另外,各種登場敵人會有自己嘅 AI 思考模式,會採取意想不同嘅方法進行攻擊,夠晒挑戰性。

Paper Cut Mansion

主線劇情以外,探索過程中會遇到大宅中各式各樣嘅 NPC,可完成佢哋嘅委託得到相關嘅獎勵及知道更多呢座大宅嘅祕密。根據官方資料,會因應玩家嘅選擇而有不同結局,總數多達廿七個。順帶一提,玩家只要喺途中死亡就會去返最初場景由頭玩過,唔好諗住玩堆屍戰術,唔 Work 的。

Paper Cut Mansion

《Paper Cut Mansion》Xbox Series X|S、Xbox One 及 PC Steam / Epic Games Store / GOG.com 預計於 10 月 27 日推出,PS5、PS4 及 Nintendo Switch 版本則會於稍後時間上市,另外 Steam 有提供免費 Demo 下載。