10 款電子門鎖功能講解｜推拉式、把手式入手攻略｜安裝要點｜實用特色功能｜解鎖方式全面睇｜廣東話【Price.com.hk 產品評測】

香港人最緊要方便，標榜唔使帶鎖匙嘅電子門鎖，自然愈黎愈受歡迎，而且電子門鎖嘅發展，都愈趨成熟，例如加入更多不同的開鎖方式、虛位密碼，甚至即時視像對話，不過係安裝電子門鎖之前，有乜嘢需要注意，道門點樣先啱裝，點樣揀一款適合自己嘅電子門鎖，今集我哋就會同大家介紹 10 款不同特點嘅電子門鎖。

電子門鎖優缺點

電子門鎖除咗可以唔使帶鎖匙，其實仲有唔少優點，例如自動上鎖，閂門之後唔使再用人手上鎖，方便之餘保安程度相比傳統門鎖更高。而且好多電子門鎖都有保安功能，如果有人強行整爛個鎖都會發出警報，或者透過訊息即時通知屋主。但係價錢比起傳統門鎖，就可以貴成幾倍到十幾倍，同埋電子門鎖防水冇傳統鎖咁好，所以唔太建議安裝喺室外。

安裝要點

電子門鎖唔單止可以裝喺屋企嘅大門，就算係鐵閘、趟門都裝到，不過唔同嘅門，都有唔同嘅安裝方法。以木門為例，就要留意門嘅厚度，大家買之前可以參考相關嘅安裝說明，會有建議或者適合安裝嘅門的厚度，普遍厚度 40 至 60mm 嘅木門都裝到。另外，要留意門外是否裝有鐵閘，因為電子門鎖體積比較大，如果大門同鐵閘中間嘅距離太少，便可能會撞到鐵閘。

門鎖種類

之後就講電子門鎖嘅種類，目前主要分為推拉式同把手式，除開門方式不同，內部嘅鎖芯也有分別，多數推拉式都會配合電子鎖芯，開鎖同上鎖都近乎全自動，閂門之後識得自動鎖返門。而把手式電子門鎖的操作比較接近傳統門鎖，以往嘅設計喺解鎖之後，要拉把手先可以開到門或者鎖門，不過近年嘅把手式都相當先進，部分型號一樣做到自動上鎖，可以話同推拉式睇齊，想點揀就視乎大家嘅使用習慣或者喜好。

LifeSmart Smart Door Lock C100

先介紹把手式電子門鎖，第一款是 LifeSmart Smart Door Lock C100，總共有 5 種解鎖方式，包括APP、指紋、密碼、智能卡、鎖匙及專用 App，可以殊看門鎖狀態及出入紀錄，亦有 Type-C 緊急供電，同埋支援手機遙距開門，最重要是價錢千八元有找，性價比相當高。

解鎖方式：App、指紋、密碼 、智能卡、鎖匙
特別功能：雙重驗証、撬門警報、安全鎖、上提門把反鎖
電源：2A X 4
後備電源：USB Type-C 
 

施耐德電氣 S51

外形簡約，採用鋅合金手柄，支援四種開鎖方式，而密碼部分提供虛位密碼功能，避免其他人看到真正的密碼，而且都有一次性密碼，甚至可以密碼加指紋雙重認證先開到鎖。另外，手柄可以手動鎖定，唔怕小朋友或者寵物誤開。

解鎖方式：指紋、密碼、智能卡、鎖匙
特別功能：虛位密碼、臨時密碼、手柄鎖定、一鍵反鎖
電源：2A X 4
後備電源：USB
 

鎖芯

作為門鎖，最重要當然係個鎖芯，一般來講， 鎖芯會分有 A、B、C  3級，當中 C 級鎖芯唔單止相對結構複雜，亦都有防爆防撞嘅優點，如果強行用工具打開，會令鎖芯鎖死，完全開唔到，是目前安全系數最高嘅鎖芯。

Philips DDL702

Philips DDL702 系列智能門鎖採用C 級鎖芯配合推拉式設計，支援四種開鎖方式同時內置 Wi-Fi，可以透過 Philips EasyKey 應用程式，查看門鎖存取記錄同密碼資料，遙距發放一次性密碼。另外，亦都有雙重驗證模式，令外人更難破解。

解鎖方式：指紋、密碼、智能卡、鎖匙
特別功能：雙重驗證、遙距密碼、室內紅外線感應、防拆警報
電源：2A X 8
後備電源：Micro-USB
 

Siemens C321

另一款同樣採用 C 級鎖芯的西門子 C321，採用把手式設計，掃描指紋嘅位置同時喺把手上，放隻手埋去就可以開到門。它還有個特別的設計，就是用上法拉第籠，可以防止外界電磁場干擾門鎖，加上內藏 2mm 厚不銹鋼板，設計相當周到。

解鎖方式：指紋、密碼、智能卡、鎖匙
特別功能：雙重驗證、遙距發放一次性密碼、室內紅外線感應開鎖
電源：2A X 8
後備電源：Micro-USB
 

特別解鎖

不少電子門鎖品牌，標榜有多種不同的開鎖方法，不過如果屋企得一兩個人，其實好少會突然轉用其他解鎖方式，反而有要留意的是，例如有d長者指紋會比較淺，未必啱用指紋開鎖又或者係一般常見嘅方法，而家再介紹幾款特別開鎖方法嘅電子門鎖。

Yale YMI70A

第一款是 Yale YMI70A，獨有無接觸式解鎖 Auto-Unlock 功能，只要預先喺專用 App set 好定位功能，當偵測到用家位置好近門鎖個陣就會自動開鎖，
如果雙手拎住嘢，的確更加方便，如果系統偵測到無開門，亦都識得自動鎖返門，唔使擔心其他人會開到門。
解鎖方式：指紋、密碼、智能卡、鎖匙、藍牙
特別功能：虛位密碼、語音提示、三分鐘鎖定、入侵警報
電源：2A X 4
後備電源：9V  電池

Rasonic RSL-VF06

市面上大部分電子門鎖都會支援指紋開鎖，而 Rasonic RSL-VF06 特別地方是用指靜脈辨識嚟代替指紋，它透過近紅外線照射手指，辨認手指入面嘅靜脈分佈，作為身份識別，如果指紋比較淺嘅朋友，利用呢個方法就比較適合。
解鎖方式：指靜脈、密碼、智能卡、鎖匙、手機
特別功能：視像通話、Wi-Fi 連接、防電磁場脈衝干擾
電源：充電式鋰電池
後備電源：Micro-USB
 

手機連接

其實今時今日嘅電子門鎖，唔單止用黎開門鎖門，仲加入唔少智能用途，例如連接手機、遙距開門，甚至乎有埋視像功能，可以隨時知道有訪客之餘，
更加直接與訪客對話。

PushLL P86-3 

如果覺得用指紋、智能卡之類嘅開鎖方式太麻煩，PushLL 嘅 P86-3 電子門鎖用上比較少用在電子門鎖上面嘅 3D 人臉識別技術，令門門過程更加簡單，而且仲可以做埋視像對話，如果有朋友嚟到而又咁啱未返到屋企，就可以先確認身份，然後利用遙距功能開門。
解鎖方式：3D人臉識別、手機、指靜脈、密碼、一次性密碼、智能卡、鎖匙
特別功能：Wi-Fi、視像通話、電子門鐘、電子防盜眼、門外偵測
電源：充電式鋰電池
後備電源：Micro-USB

LOCKLY PGD898

LOCKLY PGD898 電子門鎖 支援密碼、指紋同埋智能卡開鎖，當中嘅密碼開鎖功能，更加有 PIN Genie 專利技術，數字鍵盤會分開唔同組別擺放，每次都會重新擺位，唔怕被人睇到密碼。它同時內置有鏡頭同門鐘，當有訪客㩒門鐘，屋主手機會即時收到通知，直接透過鏡頭同訪客對話，甚至離線建立新密碼，即時 send 畀訪客使用。
解鎖方式：指紋、密碼、智能卡、鎖匙、藍牙
特別功能：視像通話、離線密碼、防偷窺電子按鍵、電子門鐘、進出紀錄、支援 Alexa 及 Google Assistance
電源：2A X 8
後備電源：9V 電池

Hyundai HY-SLA606

Hyundai HY-SLA606 電子門鎖一共有 6 種開鎖方法，室內部分亦有個屏幕，當門外有人撳門鎖上面嘅鐘，就可以睇到門外嘅訪客，如果屋主唔喺屋企，亦可透過 WiFi 用手機 App 遙距解鎖。此外，HY-SLA606 電子門鎖還有個得意功能，就是提供天氣預報，出門口就唔驚著錯衫或者唔記得拎遮。
解鎖方式：指紋、密碼、組合開鎖、智能卡、手機、鎖匙
特別功能：虛位密碼、電子門鐘、電子防盜眼、天氣預報
電源：內置鋰電池
後備電源：Micro-USB

SAMSUNG SHP DP609

SAMSUNG 發展電子門鎖多年，目前最新嘅 SHP DP609 /SHP P72 WiFi 電子門鎖，亦都特別針對無線操作功能，除了常見嘅指紋、密碼、智能卡同鎖匙，仲可以連接 WiFi好多操作同設定，都可以喺專用手機 App 搞掂，例如係設定時限性或者係一次性密碼。而且透過手機 App，仲可以收到門鎖嘅狀態，例如出入紀錄、電池過低提示之外，甚至感應到高溫都會通知屋主。
解鎖方式：指紋、密碼、智能卡、鎖匙、手機
特別功能：虛位密碼、一次性／限期密碼、實時門鎖狀態、雙重驗證 
電源：2A X 8
緊急電源：支援Micro USB於低電壓時臨時供電

 

總結

睇完以上介紹的多款電子門鎖，不知道有沒有適合你的款式，除了之前提及要留意門鎖類型同鎖芯種類，如果經常有朋友探訪，有一次性密碼或者限期密碼功能的電子門鎖，就會比較方便。如果想要保安性能比較高，除了揀有視像功能，有電子門鐘同電子防盜眼，保安程度就會更加好。