Rapper 攜 Hip Hop 貓咪宣傳智能泊車 App

前排施政報告就提出，計劃於 2019 至 2020 年度開始安裝新一代泊車咪錶，屆時駕駛者將可以使用八達通或信用卡，又或者用 App 遙距付款。除了付款方式智能化，App 內亦會提供實時的空置車位資訊。雖然聽落非常「智能」，但 2019 年，真係等到頸都長。正所謂望梅止渴，與其乾等，不如睇下其他地區的智能咪錶發展。

美國西北部的波特蘭城，當地的運輸部門今年剛完成將所有傳統咪錶，全部換成智能咪錶。駕駛者只要把車泊到車位內，到附近任何一個咪錶輸入車牌號碼，就可以選擇用信用卡或零錢付款，時限就快到的時候，用者亦可以到區內任何一個咪錶為車位加鐘。執法部門將會透過數碼裝置，輸入車牌號碼以確認車輛有否違泊。

如果你仲嫌未夠智能，唔怕！其實咪錶仲支援 App 遙距付款功能。波特蘭運輸部門為市民提供一個專用 App，名為 “Parking Kitty”，簡稱 “PK”。PK 的藍本其實是一個名為 “Passport” 的泊車 App，但波特蘭當局為原裝 App 了加入獨特的貓貓元素，還找來一位愛貓 Rapper 唱出 PK 主題曲。

用家只要用 PK 經過登記車牌及付款方式，之後每次泊車時選擇泊車的地區、時間，泊車程序就完成，極簡易！泊車時限前十五分鐘，PK 將會發出 Meow 聲的提醒，咁就唔怕俾人抄牌啦！