歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲簡評】家中運動更添玩味 《家庭訓練機》雙人同樂趣味小遊戲鍛練體能

2021-05-23

講到家中運動遊戲,應該十個有九個都會即時諗起《健身環大冒險》,但係除咗呢隻遊戲,早排有另一隻同樣主打家中運動嘅遊戲《家庭訓練機》推出,小遊戲不但玩味更濃,仲支援雙人遊玩,非常適合家中有小朋友或者同另一半一齊 Keep Fit!

家庭訓練機

家庭訓練機》係一款體感運動遊戲,由 Bandai Namco Entertainment 開發。遊戲曾經喺 Wii 推出,黎到 Nintendo Switch 上面不但畫面更靚,操作亦由以往嘅「跳舞氈」轉為 Joy-Con 加腿部固定帶,更加便利(Joy-Con 感應算係準確,不過「跳躍」動作就偶然會誤判)。遊戲基本動作主要都係圍繞跑步同跳躍兩個動作,再因應不同類型小遊戲增加如上下揮動、左右迴旋等動作。睇落簡單,但因為要不停跑跳,玩一陣就已經身水身汗,運動量絕對唔細。

家庭訓練機

呢款小遊戲就係要跑要跳

本作以小遊戲為主,內置障礙賽跑、急流獨木舟、越礦飛車、打地鼠等十六款遊戲,而且全部都支援雙人同遊,一齊玩可以話係極之歡樂,最正嘅係《家庭訓練機》繁體中文版隨盒附送兩個腿部固定帶,唔洗額外買,幾貼心。另外遊戲支援 Mii 功能,玩家可選取自己嘅 Mii 作為遊戲中嘅替身遊玩。

家庭訓練機

要一邊狂跳一邊控方向,都幾難玩

家庭訓練機

要 Keep 住上下揮動 Joy-Con 加速,轉彎時要全身配合,非常過癮

家庭訓練機

急流獨木舟係另一款要全身配合嘅小遊戲,要不時改變方向進入激流區,好考操作技巧

遊戲提供三個模式,主模式「體育大冒險」預設初、中、高強度訓練菜單,可因應自己需要揀選適合嘅菜單,唔滿意的話都可以自行設計菜單。唔想跟辛苦玩晒成個菜單,亦有「消除運動不足訓練」模式,主要係針對想「郁下」嘅朋友,進行 2 – 10 分鐘左右嘅運動,完結後亦會簡單紀錄運動量。最後就係「自由遊玩」模式,可自由選擇任一小遊戲遊玩。

家庭訓練機

唔想下下「Chur」都咁盡,可以玩輕鬆模式

家庭訓練機

玩完之後會有簡單紀錄,可惜無列明消耗咗幾多卡路里

總結:

家庭訓練機》小遊戲整體都幾有趣,可惜嘅係遊戲數量比較少,以 Party Game 黎講起碼都要有返 2-30 隻小遊戲(其實加強版好應該將 1&2  代遊戲整合)。好在體感運動遊戲暫時只有佢一款有多人同遊功能,想同屋企人一齊玩的話佢係唯一選擇。另外因為 NS 版唔洗用「跳舞氈」,玩之前強烈建議大家鋪返塊厚身嘅瑜珈氈,唔係不停跑跑跳跳的話隻腳好快痛,喺 D 字頭軍火庫有得賣,百零蚊貨就夠用。

編輯部評分:7/10

-----

此文章由VJGamer 遊戲殿提供

想早一步接收最新電玩資訊,請click VJGamer 遊戲殿 Facebook 專頁