歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲新聞】一年一度 E3 遊戲展 講完無影嘅作品年年都有

2021-06-13

又黎到一年一度嘅 E3 遊戲展,貴為遊戲業界盛事每年嘅 E3 及相關遊戲展都會有大量新作消息公佈,而且每年都總會有幾隻講完就無影嘅作品出現。今年嘅 E3 就會喺 6 月 11 號開始,因為武肺關係繼續用線上虛擬展覽方式舉行,到底之前講完等極都未出嘅遊戲會唔會有新消息?一齊回顧下呢堆作品啦!

《Halo Infinite》於 2018 E3 展上公布,曾經因為畫面表現極為「出色」而被笑到而家,不過作為微軟招牌大作相信今年 E3 會有佢嘅最新消息。

《Pragmata》上年 E3 展上公布,相隔一年仍未有更多情報,相信今年 E3 會有新嘅 Trailer 睇。

 

《Hogwarts Legacy》喺上年嘅 PS5 發表會中亮相,推出日期預定於 2022 喺 PS4、PS5、Xbox One、Xbox Series X|S 及 PC 平台發售。不過早排因為捲入製作團隊行動抗議風波,未知會否延期。

《Avowed》喺上年 Xbox Games Showcase 發表,出完條片之後就未有新消息,估計今年會繼續有片睇。

《Suicide Squad: Kill the Justice League》上年公佈,講到明 2022 年於 PS5、Xbox Series X|S 及 PC 平台發售,好大機會今次有新片講埋確實推出日期。

 

《戰神:諸神黃昏》(God of War: Ragnarök)喺上年發表,之前我哋都報導過遊戲會延期到下年,應該就會有新片同大家見面,期望會有戰鬥系統相關片段展示。

《浩劫殺陣 2》(S.T.A.L.K.E.R. 2)喺上年公佈,遊戲預定喺今年發售,應該會有多一條上市前宣傳片。

《薩爾達傳說 曠野之息2》(The Legend of Zelda: Breath of the Wild 2)喺 2019 E3 展上公布,近代滿分神作。考慮到上集係 Nintendo Switch 護航作品,好大機會係跟新一代主機消息一齊發表,如果有相關消息就一定喺 6 月 16 日 嘅「Nintendo Direct | E3 2021」入面公開。

 

《Elden Ring》喺 2019 E3 展上公布,萬眾期待嘅 FromSoftware 魂系新作。呢幾日盛傳會喺今年 E3 有試玩影片發表,仲會有埋確實推出時間,希望係真。

《Rainbow Six Extraction》喺 2019 E3 展上公布,早幾日先出完兩條新片。官方已經講到明叫大家喺 6 月 13 日凌晨二點睇 Ubisoft Forward 全球首播,唔洗估。

《鬥陣特攻2》(Overwatch 2)喺 2019 暴雪嘉年華上發表,之前有出過實機對戰直播。上集遊戲總監 Jeff Kaplan 早前已經離職,加上之前嘅直播片段令人覺得似係大型 DLC 多過係續集,如果無乜驚喜的話唔出片其實都 OK。

《暗黑破壞神 4》(Diablo 4)喺 2019 暴雪嘉年華上發表,經歷多次欺騙後,相信唔少玩家同我一樣唔會好似三代咁一早就訂。至於有無新片,今年遊戲唔會推出,可能會有片引下你哋嘅。

《滑輪英雄》(Roller Champions)喺 2019 E3 展上公布,本身食住電影《銃夢:戰鬥天使》個勢係幾吸引下,但係拖得太耐到而家都未出。官網寫嘅推出時間係「Early 2021」,不過就仲未有得玩,唔延期的話應該會喺 Ubisoft Forward 入面講埋推出日期。

《上古卷軸6》(The Elder Scrolls VI)喺 2018 E3 展上公布,B 社被微軟收購後此作被視為 Xbox 殺著,相信今年 E3 會有新片進一步落藥毒害機迷。

 

《​Starfield》喺 2018 E3 展上公布,另一隻 B 社作品。雖然關注度遠比《上古 6》低,但仍然備受期待。遊戲預計今年內上市,好大機會有上市前宣傳片睇。

 

《神鬼冒險》(Beyond Good & Evil 2)喺 2017 E3 展上公布,預計 2022 年推出,應該會喺 Ubisoft Forward 入面有最新嘅影片發表。

 

《怒海戰記》(Skull & Bones)喺 2017 年 E3 展上公布,一直等終於等到佢話 2022 年 4 月推出。由滿心期待變成「出咗咪玩」嘅心態,有無新片都唔緊要啦……。

 

《碧藍幻想 Relink》(Granblue Fantasy: Relink)喺 2016 PlayStation Press Conference in Japan 上公布,Keep 住不停有新資訊 Update。雖然經歷白金工作室退出風波,但係一直以黎發放嘅資訊都係「開發進度理想」。遊戲於 2022 年推出,期望今年有新片睇。

 

《​Dead Island 2》喺 2014 E3 展上公布,隔咁耐除咗中間換工作室之外,一直都無乜資訊,淨係知道仲係「開發中」,今年多數繼續無影。

除咗以上呢堆 Game,應該仲有好多大家都已經唔記得嘅遊戲,歡迎一齊討論,同埋估下今年有幾多隻 Game 又係得個「講」字。

-----

此文章由VJGamer 遊戲殿提供

想早一步接收最新電玩資訊,請click VJGamer 遊戲殿 Facebook 專頁