歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】共產國家哨崗檢查員 《Contraband Police》檢查所有出入人仕嚴打違禁品

2022-01-07

講到走私,香港人就會諗起凍肉、奶粉呢類野,外國就會係毒品、槍械之類,而喺共產國家好多時係講緊各類違禁品,但不論係邊一種都需要瞞過關員或者硬闖先出入到。新作《Contraband Police》就係擔任邊境哨崗檢查員,防止任何類型嘅走私出入境,題材有趣。

Contraband Police

《Contraband Police》由 Crazy Rocks 開發,係一款模擬管理動作遊戲,採用第一身視點。遊戲以 1980 年代架空共產國家為舞台,玩家將扮演守住邊境哨崗嘅檢查員,負責檢查每一輛出入國家嘅汽車,檢查護照證件真偽、車上有無改裝收藏違禁品、守護邊境等等,當然作為邊境檢查員,收受賄賂都係日常工作一部份,玩家可自行決定收唔收錢,非常真實。

Contraband Police

遊戲主要部份當然係檢查過境車輛呢部份,話到明走私,咁就梗係唔會成件貨擺喺你面前,走私者會將貨品收埋喺車入面各種地方,最簡單嘅係放喺行李箱入面,較困難嘅係會改裝車內空間,例如收藏於座位入面,有時甚至係走私被通輯者,所以除咗搵貨之外,檢查證件真偽都非常重要。又因為國家政策朝令夕改,信息板會不時更新出入境政策,例如因為國家衝突、防疫政策而收緊過關條件,更有機會要求入境者遞交疫苗護照,六點後禁止堂食等條件。 

Contraband Police

除咗檢查車輛,玩家仲需要管理邊境哨站。喺今次嘅序章玩家只需要管理身處嘅哨站,當中包括日常物品採購、維護、擴建倉庫等費用,透過辦公室入面嘅電腦可以了解日常開支、僱用員工等費用,亦有升級建築物及購買新車等選項。

Contraband Police

上面有提到,走私者除咗用假護照、收藏違禁品等方法過境,仲會硬闖,有時係衝關,亦有機會係走私集團發動大規模攻擊。面對呢個情況,遊戲就會變成第一身射擊遊戲,目標係將所有敵人擊敗。隨遊戲推進,後期敵人會越黎越強,你可以僱傭更多關員幫手,升級裝備增加生存機會(可透過完成日常工作或者收受賄賂賺錢升級)。另外玩家亦可以喺休班時探索附近地圖,完成野外野外任務獲取獎勵。

Contraband Police

《Contraband Police》預定於 2022 年第二季推出,對應平台為 PC Steam,現時有序章體驗版供免費下載。