歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】以文為圖冒險解謎 《文字遊戲》繁體中文玩家先識玩的高質遊戲

2022-01-14

文字遊戲對一般人黎講可能代表冗長對白,超龐大劇本,基本上就係睇字睇到想死,但係今次介紹嘅遊戲可能令你改觀。台灣製作嘅《文字遊戲》係一款「純文字」遊戲,不過佢係以文字拼成圖像,當中又要拆解文字解謎,畫面豐富玩法有趣,更橫掃一堆獎項,仲只有繁體中文玩家先識玩,絕對值得支持!

文字遊戲

《文字遊戲》由台灣獨立團隊 Team 9 開發,係一款「純文字遊戲」。雖然話係只有文字嘅遊戲,但係因為所有物件、人物、場景都係由文字所構成嘅圖像,而且「字」仍然會保留佢原有嘅意思。例如喺密室中,明確地標示「這裡沒有門」,但因為係文字遊戲,「門」字本身就係一度門,打開就可以離去。

文字遊戲

上面嘅例子只係其中一種玩法,遊戲中有大量以文字構成嘅謎題,玩家要喺字裡行間找出端倪,刪去文字顛覆句義,或推移文字改寫事實。例如上面「這裡沒有門」,將句字中嘅「沒」字刪除變成「有門」,無中生有;又或者重組句子「穿梳字句,你將能碰倒機會 懷抱二心 重現失落的美好」,抽出「倒」字的人字部,將之與「二」組合成仁,改變句子意思解開謎題。類似嘅玩法仲有好多,解謎變化甚高,極為豐富。

文字遊戲

《文字遊戲》曾獲巴哈姆特 ACG 創作大賽金賞 & 最佳創意獎、台北國際電玩展 Indie Game Award 最佳創新獎等多個獎項,實力非凡。喺舊年推出嘅免費前傳故事「第零章」更得到「壓倒性好評」評價,網友們更留言「為避免簡體缺字導致卡關,建議繁體中文遊玩」,嘲諷全開。

文字遊戲

《文字遊戲》預計於 1 月 21 日推出,對應平台為 PC Steam。由於本作需了解文字部首、字詞前後差異,所以只建議繁體中文語系玩家遊玩。