歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】超現實解謎冒險 《工房庫:噩夢歷險記》日本三大扭曲遊戲之一再度上市

2022-06-24

九十年代末,日本有被稱為「三大扭曲遊戲」(日本三大歪みゲー)嘅詭異 Game,分別係《BAROQUE~歪んだ妄想~》、《KOWLOON’S GATE 九龍風水傳-》以及今次介紹嘅《GARAGE 工房庫:噩夢歷險記》。後者相隔廿多年之後重新上市,舊年推出手機版,而家就出埋 Steam 版,喺日本再度引起話題。

GARAGE 工房庫:噩夢歷險記

《GARAGE 工房庫:噩夢歷險記》由 Kinotrope 開發,美術則由超現實主義畫家作場知生負責,係一款解謎冒險遊戲。故事講述「工房庫」呢個精神治療裝置會透過影響實驗對象潛意識,創造出黑暗嘅奇異世界。主角使用後發現置身一個充滿破舊金屬及污水嘅黑暗世界,而生活喺呢度嘅居民都係有怪異外型嘅生化機械,當然主角外型都係同佢哋一樣,目標自然係逃出呢個奇怪嘅世界。

GARAGE 工房庫:噩夢歷險記

遊戲基本上以解謎為主,但亦會有角色扮演元素,例如經身體改造嘅玩家有成長要素以及有深度嘅釣魚系統。角色有 EGO(自我)及 FUEL(燃料)兩項數值,需要不時補充,任一耗盡都會死亡。美術上就充滿超現實感,加上種種設定上嘅內容令玩家充滿不協調感與不安感。例如通過釣魚可獲得青蛙嘅生殖器;幫居民修理「八音盒」會發出怪異音調等等。

GARAGE 工房庫:噩夢歷險記

《GARAGE 工房庫:噩夢歷險記》復刻版幾乎所有圖像都經過重新修飾及修正,使用者介面、遊戲平衡性亦有所改良,更加入了全新章節、支線任務與多重結局。順帶一提,1999 年 PC 原版只係生產咗 3500 隻就停製,令到實體版光碟極為罕見,售價曾高達 25 萬日圓一隻,成件事已經好都市傳說。

GARAGE 工房庫:噩夢歷險記

《GARAGE 工房庫:噩夢歷險記》復刻版預計於 7 月 8 日推出,對應平台為 PC Steam,支援繁體中文。