歡迎來到Price
  • 商戶分類
  • 情報
  • 二手
  • 網購
  • 商戶中心
  • 語言
Price

【遊戲介紹】中世紀溝科幻世界 《The Last Oricru》雙人合作高難度角色扮演

2022-08-26

奇幻中世紀即係劍與魔法,理論上同科幻野就拉唔上關係,即將推出嘅新作《The Last Oricru》就將劍與魔法同科幻元素結合,仲可以同好友共同戰鬥,喜愛呢類型題材兼動作遊戲嘅朋友要留意啦。

The Last Oricru

《The Last Oricru》由  GoldKnights 開發,係一款動作角色扮演遊戲,採用第三身視點,可雙人線上或線下合作(分割畫面)。遊戲發生喺一個被保護罩隔絕嘅星球,部分環境已改造為適合人類居住,但係星球上有兩大種族,之間不停發生衝突。被冷凍多年嘅主角再次醒來,喺兩個衝突不斷種族之間游走,左右兩族間嘅決定,並喺弱肉強食嘅環境下努力生存。

The Last Oricru

喺主線劇情中,玩家會慢慢揭開呢個星球嘅過去,了解各種衝突背後所發生嘅原因及理由。有趣嘅係,當中會因應玩家嘅決定而帶來各種後果,你嘅選擇並無對錯之分,但係會影響故事及角色嘅發展、遊戲流程甚至係結局,又因為劇情故事龐大,基本上要玩幾次先會拼湊到完整嘅劇情。

The Last Oricru

戰鬥方式有近戰有遠攻,有盾牌、劍、弓箭等武器,亦有魔法、科技道具、輔助技能等等,另外仲會有重量管理以及翻滾迴避等近年動作遊戲常見嘅要素,而官方亦表明本作戰鬥係頗有難度的。作為一款角色扮演遊戲,自然有得升 LV,玩家可分配角色點數整一隻有自己特色嘅角色,堆防做坦、專玩智力做魔法師等等,最正嘅係雙人合作模式中有專用合作咒語,同單打有唔同感覺,好正!

The Last Oricru

《The Last Oricru》預計於 10 月 13 日推出,對應平台為 Xbox Series X|S、PS5 及 PC Steam,支援繁體中文。喺最近公開嘅 Trailer 入面有 Drop Frame 情況,希望正式版會修正此問題。